محمد صادق يكتب : سرقوا” الفار ” يا جبلاية لكن مفتاحه معايا !!

ساويرس خطفه من اندية الغلابة
—————————————-
سرقوا” الفار ” يا جبلاية لكن مفتاحه معايا !!؟
===========================
حكاية الفار يكتبها :
محمد صادق
—————–
زمان كنا نسخر على طريقة الفنان القدير علي الكسار بالعبارة الشهيرة التي كان يرددها في احدى مسرحياته ” سرقوا الصندوق يا محمد لكن مفتاحه معايا ” ولم نكن ندري انه بعد عشرات السنين سياتي من يذكرنا بعم علي الكسار من خلال ” حكاية الفار ” .
فلقد استيقظ الكويرة مع اول شهر رمضان على مشهد في بدايات الجولة 22 لمسابقة الدوري ..وبالتحديد مباراة المصري والزمالك ..
المعلق منفعلا ” يا ترى الحكم هيرجع للفار في اللعبة دي ؟؟ وبعد ثواني ..المعلق يعقب.. لا شكله يا جماعة الفار عطلان ..ثم بعد دقائق يصرخ يا نهار ..يا نهار ده مفيش فار !!!!!
قلنا يمكن الفار بعافية او فار هذه المباراة وقع في مصيدة قطه سيامي صايمة فهرسته بين اسنانها ونقلوه لمستشفى الكلب لعلاجه وسيعود في اقرب مباراة ..!!
وفي ثاني يوم بدات مباراة اخرى واستدعى عمنا حكم المباراة كابتن كل فريق واخذ يحدثهم بلغة الاشارات ويشير لهم ..وايضا للجمهور.. بعلامة المستطيل ليتدخل المعلق ويترجم الاشارة قائلا “حكم المباراة بيقول للفريقين اعملوا حسابكم مفيش فار ” !!!
لليوم الثاني والثالث والرابع وللمباراة العاشرة الكل حيران يتساءل فين الفار ؟؟..وتوالت المباريات في غياب الفار وكانه اصبح امرا واقعيا عاديا ان تقام المسابقة بدون فار !!
وفي ظل هذة التساؤلات ..لا احد في الجبلاية يجيب او يرد على حكاية الفار الذي اختفى ..ولا احد من جهابذة المعلقين قادر ينطق بكلمة واحدة ويقول ان الفار خرج يتفسح في حدائق اكتوبر او الشيخ زايد مثلا او في كايرو فيستفيال او بالتجمع الخامس .. او ان الفار هرب من مصيدة الجبلاية ومنعرفش فين !!.
اما الغالبية العظمى من نقاد الرياضة فقد التزموا الصمت رغم انهم يعرفون الاعيب الفار ..وهوه راح فين ” لكن مفيش واحد قدر يفتح بقه ليريح الراي العام بكلمة او معلومة عن الفار الذي اختفى في ظروف غامضة .
وبدات بعض المواقع الالكترونية تنقل اخبار من الجبلاية من نوعية ” قال مصدر مسؤل في اتحاد الكرة ان الشركة المتعاقد معها االاتحاد سحبت اجهزة الفار لأن لها مستحقات مالية لدى الاتحاد ..وان الاتحاد مفهوش فلوس ” !!
وخبر تاني يقولك ” رابطة الاندية المحترفة تهدد في حالة عدم رجوع الفار ”
يا نهار اسوخ ومنيل ..ازاي ؟؟هية بوابة من غير بواب الفار هرب والاجهزة خرجت من المحروسة بدون احم او دستور .!! “كدة ..بدون انذار بفسخ العقد من جانب الشركة ..بدون تهديد بفسخ العقد ان لم يدفع الاتحاد المستحقات ..
وخبر ثالث يقول ” صرح مصدر رفض ذكر اسمه ان شركة الفار ليس لها مستحقات مالية وان العقد معها كان يتضمن الحصول على 1800 دولار عن المباراة الواحدة لكن الاتحاد قام بتغيير العقد ويدفع 3000 دولار عن المباراة الواحدة بشرط ان تؤل الاجهزة لملكية الاتحاد في نهاية مدة التعاقد !!
تكهنات
——–
ومع اختفاء الفار ثارت التكهنات وكل واحد بدأ يفتي ..واحد يقولك اصل اللجنة اللي كانت بتدير الاتحاد عملت عقد مضروب مع الشركة الاجنبية صاحبة الفار !!
– واحد ثاني يقولك اصل احمد مجاهد رئيس اللجنة الثلاثية عمل عقد مع شركة الفار بدون شروط جزائية على الشركة في حالة الفسخ من طرف واحد .
اما مسؤلوا الاندية وجماهيرهم فهم الاخرون بداوا سلسلة من سوء الظن فالاهلاوي يقولك “دي مؤامرة هربوا الفار ” علشان خاطر الزمالك ياخد راحته ويفوز بالاحتواء من جانب الحكام !!
– والزملكاوي يقولك ” طبعا الننوس عين نن الدولة مبسوط لغياب الفار علشان ياخد الدوري براحته !!
والاندية الصغيرة تصرخ ” حقنا هيروح هدر وهنهبط .. طالما مفيش فار المجاملة هتبقى للكبار ؟؟
الفار في المصيدة
—————
وفي ليلة من ليالي رمضان كانت الدورة الرمضانية الدولية اللي نظمها نادي” زد ” بتاع الاكابر اولاد الاكابر في عز سخونتها بالتجمع ..ومصور صحفي “لئيم “صور حكام الدورة وهمة بيراجعو الفار قبل اتخاذ القرار في احدى اللعبات !!
يا نهار يانهار ..الفار ساب الجبلاية وبقدرةة قادر شغال لوحدة في دورة “زد ” الرمضانية الدولية .
يا نهار يا نهار ..ده مش الفار لوحدة ..ده الفار واللي مشغلينه ..
يانهار يا نهار ..ده الفار بالحكام الدوليين من عينه اخونا ابراهيم نور الدين !!
يا نهار يانهار ..انتو عارفين مين اللي قاعد هناك بيتفرج على الدورة الرمضانية ؟؟
– حزر فزر ..مين ده ؟؟ ..ده معالي وزير الشباب والرياضة اشرف صبحي ..ومين الناس التانية دي ..ده رئيس رابطة الاندية المحترفة اللي قال انه ميعرفش الفار راح فين وطبعا هتلقى معاه كل الشلة بداية من سيف زاهر ووصولا الى بركوته والثلعب وغيرة وغيره …والكل كليلة ..!!!
كل دول جايين علشان يمسكوا الفار متلبس بالهروب في التجمع !.
صفقة ساويرس
—————
واحد خبيث همس في ودن واحد سمعه تقيل قاعد جنبه وقال له ” على فكرة الجماعة اللي هناك دول ..اللي مش ظاهرين في الصورة ماجرين الفار من الباطن لعمنا ساويرس رئيس نادي زد علشان الدورة الدولية تنجح قدام الاجانب المشاركين في الدورة زي أستون فيلا الإنجليزي، فينورد الهولندي، فيتوريا جيماريش البرتغالي، وباناثينايكوس اليوناني” .
صاحبنا اللي سمعه تقيل وفهمه قليل صرخ وقال ..” مش سامع حاجة” !!
جه واحد خبيث تاني وقرب من ودنه وقاله ” يا حبيبي اللي قاعدين هناك دول واللي لابسين الكرفتات الشيك دول همة اللي وافقو للفار انه ينتقل على سبيل الاعارة من مباريات الدوري المصري الى الدورة الرمضانية ” بتاعة زد ” بالتجمع ..فهمت يا اطرش ؟
ولان صاحبنا اللي سمعه تقيل ..فهمه قليل صرخ وقال يعني قصدك” سبوبة “…راح التاني صرخ فيه وقاله اسكت الله يخرب بيتك هاتودينا في داهية !!
توته توته ..خلصت الحدوته
================
وهنا ادركت شهرزاد الصباح ..فسكتت عن الكلام المباح ..وعاد الفار للدوري ولليالي الملاح ..بعد ان انتهت الدورة الرمضانية الدولية وفاز بيها الاهلوية ..وياريت نكفي على الخبر ماجور ..ومنجبش سيرة الحكاية ديه !! .